«Қазақстан коммуналдық жүйелері» (ҚКЖ) компаниялар тобына кіретін «МӨЭК» АҚ-да Леонора Валерьевна Мұхамбетованы құрметті демалысқа салтанатты түрде шығарып салды. Екі онжылдықтан астам уақыт бойы оның кәсіби өмірі электрмен жабдықтау, есептеулер, есепке алу және адамдармен жұмыс істеу саласымен тығыз байланысты болды.
Еңбек жолында Леонора Валерьевна бақылаушыдан бастап қалалық өткізу қызметінің инженеріне дейінгі жолдан өтіп, энергетика саласындағы түрлі кәсіпорындарда еңбек етті. Адал еңбегі мен кәсібилігі үшін бірнеше рет марапатталды.
Бәрі бақылаушының қарапайым келуінен басталды
Леонора Мұхамбетованың энергетика саласындағы жолы 2001 жылы басталған еді. Сол кезде үйіне бақылаушы келгеннен кейін ол алғаш рет электрмен жабдықтау саласында жұмыс істеу туралы ойланады.
«Энергетикадағы менің тарихым қарапайым адамгершілік қызығушылықтан басталды. 2001 жылы коммерциялық есепке алу құралдарын тексеру үшін үйіме бақылаушы Елена Носова келді. Маған оның жұмысы: мұқияттылығы, сауаттылығы мен адамдармен сыпайы тіл табысуы өте ұнады. Өзім де әрдайым араласып, сөйлескенді ұнататынмын, содан кейін осындай салада жұмыс істегім келеді деп ойладым», — деп еске алады Леонора Валерьевна.
Оның айтуынша, бұл мамандық оған бала кезінен ата-анасы сияқты экономист болуды армандағаны үшін де жақын болған.
«Маған әрдайым есепке алу, есептеулер жүргізу және адамдармен жұмыс істеу қызықты еді. Сондықтан энергетика, сайып келгенде, осының бәрін тоғыстыра алған салаға айналды», — дейді ол.
2002 жылдың мамырында Леонора Мұхамбетова «Маңғышлақ атом энергетикалық комбинаты» мемлекеттік кәсіпорнына жұмысқа орналасады. Оны РКЦ-ге (Есептеу-кассалық орталығы) №3 есепке алу нөмірінің бақылаушысы етіп қабылдайды. Ал 2004 жылы-ақ ол аға бақылаушы атанады.
Бақылаушыдан инженерге дейін
Еңбек еткен жылдары Леонора Валерьевна түрлі бағыттарда өзін сынап үлгерді. 2006 жылы энергокомбинаттың Құрмет грамотасымен марапатталса, 2009 жылы оның фотосуреті жылдың үздік қызметкері ретінде Құрмет тақтасына орналастырылды. Ол сонымен қатар ұжымның қоғамдық және корпоративтік өміріне де белсене қатысты: РКЦ-де «Нұр Отан» партиясының төрағасы болды, КВН конкурстарына, Наурыз мейрамын тойлауға және басқа да шараларға қатысты.
2009 жылы Леонора Мұхамбетова РКЦ басқармасына, ТКС және ПУ тобына инженер-инспектор болып ауысады. 2013 жылы коммуналдық қызметтерді есептеу тобының өткізу жөніндегі экономисі лауазымына ауыстырылды. Кәсіби жолының келесі кезеңі «AES Ақтау» ЖШС-дегі жұмыс болды. 2019 жылдан бастап Леонора Валерьевна электр теңгерімі бөлімінің ресурстар жөніндегі бухгалтері болып жұмыс істеді. 2020 жылы кәсіпорын директорының Алғыс хатымен марапатталды.
2021 жылы ол «Маңғыстау Жарық» ЖШС-де электр теңгерімі жөніндегі инженер ретінде еңбегін жалғастырып, онда да грамотаға ие болды. Ал 2025 жылы Леонора Мұхамбетова «МӨЭК» АҚ-ға ауысып, қалалық өткізу қызметінің инженері лауазымын атқарды.
Бүгінде өткен кәсіби жолына көз жүгірте отырып, Леонора Валерьевна осы жылдар ішінде энергетика ол үшін жай ғана жұмыстан әлдеқайда жоғары ұғымға айналғанын айтады.
«Жер жиырма жылдан астам уақыт ішінде мен өте көп адамдарды кездестірдім, мол тәжірибе, білім жинақтадым, достар таптым. Түрлі кезеңдер, әртүрлі лауазымдар, жаңа міндеттер мен ұжымдар болды, бірақ осының бәрі өмірімнің бір бөлігіне айналды. Мен жұмыс істеген жылдарымды ризашылықпен еске аламын», — дейді ол.
Ол үшін құрметті демалысқа шығарып салу сәтінің грамотамен және алғыс хатпен сүйемелденуі ерекше маңызды болды.
«Мен үшін бұл жай ғана құжаттар емес. Бұл — еңбек еткен жылдарымның, бірге жұмыс істеген адамдарымның және көптеген жылдар бойы мүшесі болған ұжымымның елесі, естелігі. Еңбегімнің бағаланғанына өте қуаныштымын», — деп бөлісті Леонора Валерьевна.
Оның айтуынша, энергетикадағы жұмыс оны ең басты нәрсеге үйретті — кәсібилік тек білімнен ғана тұрмайды.
«Кез келген мамандықтағы сияқты, энергетикада да табысқа жету үшін білім, табандылық, сыпайылық, өз ісіне адалдық және әріптестерге деген құрмет қажет деп есептеймін. Жұмыс істеген жылдары кәсібилік тек білім мен тәжірибе емес екеніне көзім жетті. Көп нәрсе адамдарға және өз жұмысыңа болған қарым-қатынасқа байланысты», — деп атап өтті ол.
Өмірдің жаңа кезеңі
Құрметті демалысқа шығуды Леонора Валерьевна белсенді өмірдің аяқталуы емес, өзіне және отбасына көбірек уақыт бөлу мүмкіндігі деп қабылдайды. Енді оның жоспарында денсаулығын күту, жақындарымен көбірек уақыт өткізу және қыздарына қолдау көрсету бар. Леонора Валерьевна 16 және 11 жастағы екі қыз тәрбиелеп отыр. Үлкені Қазақстан тарихына қызығады, ал кішісі сурет салғанды жақсы көреді.
«Зейнетке шығу мен үшін белсенді өмірдің соңы емес, жаңа кезеңнің басталуы. Ең алдымен денсаулығымды түзеп, отбасыма көбірек уақыт бөліп, қыздарыма қолдау білдіргім келеді. Қазір олар өздерін іздеп жатқан жаста, сондықтан қастарынан табылып, көмектесіп, демеу болғым келеді», — дейді Леонора Мұхамбетова.
Леонора Валерьевнаның көптен бергі арманы да бар.
«Сайрандап саяхаттағым, жаңа жерлерді көргім, жаңа нәрселерді білгім келеді. Меніңше, қазір армандарымды біртіндеп жүзеге асыратын ең қолайлы уақыт», — деп жымияды ол.
Бүгінде Леонора Валерьевна 2001 жылғы бақылаушының қарапайым келуі өзі үшін мамандықтағы бастапқы нүктеге айналған сонау күнді ерекше ықыласпен еске алады.
«Энергетика өмірімнің үлкен бөлігіне айналып, маған тәжірибе, білім, достар және жақсы адамдармен көптеген кездесулер сыйлады. Кезінде қарапайым бақылаушының жұмысы мені қызықтырып, кәсіби жолымның басталғанына өте қуаныштымын», — деп түйіндеді сөзін ол.
Әріптестері Леонора Валерьевнаға көпжылдық адал еңбегі, кәсібилігі, жауапкершілігі және кәсіпорын жұмысына қосқан үлесі үшін алғыс айтып, мықты денсаулық, амандық және өмірде жаңа жарқын беттер тіледі.
